متابعة 11 شخصا بجناية التزوير في ورقة رسمية وصنع شهادة تتضمن وقائع مغلوطة

 نوستالجيا التزوير " مدينة الهاوتات "

قاضي التحقيق بالغرفة الثالثة بمحكمة الإستئناف بطنجة يتابع 11 شخصا بجناية التزوير في ورقة رسمية وصنع شهادة تتضمن وقائع غير صحيحة .

كان في الأول محضر مكتوب بخط اليد وموقع من طرف أعضاء اللجنة اللي خرجت تعاين العمارة .

الاستنتاج اللي خرجت بيه اللجنة مفاده أن العمارة خصها خبرة تقنية صادرة عن مختبر باش يحدد واش الاساسات ديالها باقيين صحاح او خصها تهدم .

من بعد حسب ما قالوا شي وحدين بالي جاهم اتصال من العمالة كيقولهم بدلو داكشي كولو واقترحوا الهدم...

اللجنة كتعاود تجتمع بمكتب رئيس دائرة للا منانة بشارع محمد الخامس بمدينة العرائش بحكم انه هو رئيس اللجنة وكيعاودوا محضر آخر في نفس اليوم ومغديش يحضر واحد الموظف من واحد المصلحة وغادي يستبدلوه بموظف آخر. 

المهم تكتب محضر جديد واقترحت اللجنة الهدم .

اللي مكانوش عارفين هادوك لي عيطو او هادوك اللي وقعوا في المحضر الثاني باللي نسخة من المحضر الأول تم تسربيها. 

اصحاب المحلات اللي كانوا خدامين على ريوسهم غادي تحول حياتهم إلى جحيم من بعد ما بدأت كتجيهم إنذارات بالإفراغ وكيتصدر احكام ضدهم في جميع مراحل التقاضي واللي خصهم يخرجو من المحلات ديالهم .

اصحاب المحلات دائما كان التساؤل ديالهم علاش المحكمة كتحكم عليهم بالإفراغ وهما عندهم محضر اللجنة فيه أن اللجنة تقترح ان هذ العمارة خصها خبرة . اصحاب المحلات مشاو جابو مختبر عمومي وأكد في الخبرة ديالو باللي هذ العمارة صحيحة ومتينة الاساسات خصها فقط بعض الإصلاحات الطفيفة .

ناس ديال المحلات مكنوش عارفين باللي راه كاين محضر آخر فيه اقتراح هدم العمارة وان المحاكم على اختلاف درجاتها كانت تبني قرارها على محضر اللجنة اللي فيه مقترح الهدم وهادشي مفهوم حيث القضاء كيحكم بناء على الوثائق المتوفرة .

المهم ناس ملي عرفوا باللي اللجنة دارو جوج محاضر المحضر الأول بخط اليد كيقول أنهم مقدرينش يقررو واش العمارة تهدم أولا خص مختبر متخصص هو لي يقرر ومن بعد ساعة او ساعتين نفس اللجنة باستثناء عضو كيقترحوا تهدم العمارة .

السؤال هو شكون هذا لي عيط بالتلفون اللجنة وقالهم بدلوا الاقتراح وهادشي هما قالوه ماشي أنا ؟؟؟

جوج واش ملي غيروا المحضر واش هادشي كان مجاني ؟؟؟ هذا تساؤل مشروع وليس إدانة لجهة ما ؟؟؟

الخطير هو أن البيع ديال العمارة كان ف مارس والرخصة ديال مقرر الهدم تسلمت للبائعين شهرين او اكثر من بيع العمارة.

السؤال كيفاش العمارة تباعت في شهر مارس والرخصة خرجت ف شهر 6 في اسم للبائعين ماشي ف اسم اللي شراو العمارة ؟؟؟

هذا غير الجزء الأول 

عاد غادي نجيو لهذاك لي وقع على مقرر الهدم و شنو قالهم وشحال ....

#محمد_بلمهيدي

يتبع